பைத்துல் அஹத் பள்ளிவாசல்

1835 ஆம் ஆண்டு மனித வரலாற்றில் பெருமைக்குரிய இடத்தைப் பெற்றுள்ளது. அந்த ஆண்டில், வட இந்தியாவில் உள்ள காதியான் என்ற அறியப்படாத கிராமத்தில் ஒரு குழந்தை பிறந்தது. பல தலைமுறைகளாக, அவரது முன்னோர்கள் காதியானைச் சுற்றியுள்ள பகுதியைச் சிறப்பாக ஆட்சி செய்து வந்தனர். ஆனால் அந்தப் பெருங்குடும்பம் நலிவடைந்து தனது பெருமையில் பெரும்பகுதியை இழந்திருந்தது. பிறந்த அக்குழந்தை சாதாரணக் குழந்தை அல்ல. ஆன்மீகத் துறையில் மட்டுமின்றி உலகியல் துறையிலும் ஒரு பெரும் புரட்சியை ஏற்படுத்த அவர் விதிக்கப்பட்டிருந்தார். அவரது பெற்றோர் அவருக்கு குலாம் அஹ்மது எனப் பெயரிட்டனர்; பின்னர் அவர் ஹஸ்ரத் மிர்ஸா குலாம் அஹ்மது காதியானி என உலகிற்கு அறியப்பட்டார். இறைவன் அவரை மஸீஹாகவும் மஹ்தியாகவும் நியமித்தான்.